El delegado do Goberno en Galicia, José Ramón Gómez Besteiro, atópase xa exercendo o seu cargo na sede da Delegación desde este mércores tras oficializarse o seu nomeamento coa publicación do Real Decreto 217/2023, do 28 de marzo, no Boletín Oficial do Estado (BOE), conforme ao aprobado no último Consello de Ministros. O novo delegado do Goberno de Pedro Sánchez en Galicia presentouse á totalidade do cadro de persoal na sede da Delegación, nA Coruña, e recibiu no seu despacho ás subdelegadas e o subdelegado provinciais. O seu acto oficial de toma de posesión terá lugar o vindeiro luns 3 de abril ás 13.30 horas no Palacio de Exposicións e Congresos da Coruña (Palexco) coa presenza da ministra de Política Territorial, Isabel Rodríguez, e o ministro de Sanidade, José Manuel Miñones, anterior delegado do Goberno.
Desde o seu nomeamento, Gómez Besteiro dedicouse a coñecer as dependencias e as diferentes áreas da Delegación do Goberno en Galicia, onde tomou contacto coas empregadas e os empregados públicos que traballan en cada un dos departamentos. Este mesmo xoves mantivo reunións con cada responsable provincial: a subdelegada do Goberno nA Coruña, María Rivas; a subdelegada en Pontevedra, Maica Larriba; a subdelegada en Lugo, Isabel Rodríguez; e o subdelegado en Ourense, Emilio González.