El delegado do Goberno en Galicia, José Miñones, trasladou hoxe en Lugo a aposta inequívoca do Goberno de Pedro Sánchez pola reforma e consolidación da Formación Profesional, a través de reformas lexislativas e orzamentos históricos e co impulso do Plan de Recuperación, Transformación e Resiliencia: “Cando falamos de Formación Profesional, falamos dunha oportunidade para os mozos de recibir unha formación de calidade que lles abra a porta cara a empregos estables e cualificados”, indicou. José Miñones reivindicou este obxectivo da lexislatura nunha visita ao Centro Integrado de Formación Profesional “As Mercedes”, de Lugo, onde felicitou á comunidade educativa pola súa recente incorporación á Rede Estatal de Excelencia de Formación Profesional.
O delegado do Goberno en Galicia, xunto á alcaldesa de Lugo, Lara Méndez, e a subdelegada do Goberno na provincia, Isabel Rodríguez, coñeceu as iniciativas educativas e os programas que desenvolve este centro co apoio do Ministerio de Educación e Formación Profesional. Tamén recoñeceu o traballo de directiva, claustro e alumnado, que converteu a este centro lucense en referente estatal en sectores estratéxicos como o aeronáutico, as enerxías limpas e as novas tecnoloxías.
Cara a unha nova Formación Profesional
José Miñones repasou as principais liñas de acción do Goberno para consolidar unha Formación Profesional adaptada ás esixencias da economía e do mercado de traballo, que demanda cualificación e competencia. Esta modernización é posible coa combinación das reformas lexislativas, como a nova Lei de Formación Profesional, e co esforzo orzamentario sen precedentes desta lexislatura. “Só este ano/este ano, destinaremos 2.401 millóns de euros á Formación Profesional en España”, explicou o delegado.
A estas liñas únense os investimentos estratéxicos do Plan de Recuperación, Transformación e Resiliencia, que dispón dun compoñente específico, “Plan Estratéxico de Impulso da Formación Profesional” cun orzamento total de 2.000 millóns de euros.
Rede de Excelencia de Formación Profesional
Precisamente, a Rede Estatal de Excelencia de Formación Profesional, da que forma parte o CIPF As Mercedes, forma parte do Plan de Recuperación, Transformación e Resiliencia. Esta rede conforma un grupo de centros de referencia, “coa mellor dotación técnica e de infraestruturas, que sirva para deseñar, experimentar e someter a contraste non só programas formativos, senón tamén accións de transferencia do coñecemento no ámbito da formación profesional”, detallou o delegado.
O Ministerio de Educación seleccionou en novembro do ano pasado e a través dunha convocatoria competitiva os primeiros 44 centros que integran a rede. En esta resolución, tres centros galegos: o CIFP Carlos Oroza de Pontevedra, o CIFP As Mercedes e o CIFP Ánxel Casal da Coruña, alcanzando as mellores puntuacións de todo o territorio español. En concreto, en aeronáutica o CIFP As Mercedes obtivo a máxima puntuación e quedou segundo na puntuación global de todos os centros.
Con esta selección, o Ministerio de Educación e FP concedeu 2,3 millóns de euros aos tres centros galegos, dos que 795.000 destínanse ao CIFP As Mercedes. Con este orzamento, o centro poderá reforzar a súa aposta pola innovación educativa aplicada ao ámbito aeronáutico.
Convocatorias de innovación educativa
O delegado do Goberno supervisou o desenvolvemento doutros proxectos de innovación educativa nos que participa o CIFP As Mercedes e que tamén financia o Ministerio de Educación e FP, a través das convocatorias anuais de “Proxectos de innovación e investigación aplicadas e transferencia do coñecemento en Formación Profesional”.
Neste caso, o CIPF participa en tres programas, en colaboración con centros doutras comunidades autónomas e que se dedican a temas vinculados ás enerxías renovables. A través destas convocatorias, o Ministerio achegou ao CIFP As Mercedes preto de 150.000 euros para financiar a súa participación nestes programas.