• Estas axudas permitirán a posta en marcha de proxectos de interese xeral para o sector agroalimentario e forestal desenvolvidos por grupos operativos en máis dunha comunidade autónoma • Cada proxecto poderá recibir ata 600.000 euros e incentívanse todo tipo de innovacións que favorezan a competitividade económica e o mellor desempeño ambiental e social, a través de consorcios que dean lugar a grupos operativos da AE-Agri • Esta liña de financiamento conta cunha dotación total de 75 millóns de euros no período de aplicación do Plan Estratéxico da Política Agraria Común (2023-2027)
O Ministerio de Agricultura, Pesca e Alimentación convoca axudas por 37,5 millóns de euros para proxectos de innovación suprautonómicos
04/08/2023
A convocatoria foi publicada hoxe no BOE
4 de agosto de 2023.- O Ministerio de Agricultura, Pesca e Alimentación, a través do Fondo Español de Garantía Agraria (FEGA), abriu a convocatoria, de forma anticipada para 2023, de axudas para a preparación e execución de proxectos de innovación de interese xeral por grupos operativos supraautonómicos da Asociación Europea para a Innovación en materia de produtividade e sustentabilidade agrícolas (AEI-Agri). A convocatoria ten un orzamento de 37,5 millóns de euros.
A resolución de convocatoria publicouse hoxe no Boletín Oficial do Estado (BOE) Estas axudas inscríbense no marco do Plan Estratéxico da Política Agraria Común (PEPAC) de España e están financiadas nun 80% polo Fondo Europeo Agrícola de Desenvolvemento Rural (Feader) e nun 20% con cargo ao orzamento do Ministerio de Agricultura, Pesca e Alimentación (MAPA). Esta liña de financiamento conta cunha dotación de 75 millóns de euros no período de aplicación da nova PAC 2023-2027).
Poderán solicitar estas axudas as agrupacións, cun máximo de 8 integrantes, de persoas físicas ou xurídicas que incorporen a un actor do sector agroalimentario e forestal e sumen outro tipo de entidades (do sector investigador ou do coñecemento, organizacións non gobernamentais, grupos de acción local, organizacións da sociedade civil). Deberán presentar un proxecto innovador con execución en varias comunidades autónomas conforme as súas necesidades básicas e estratéxicas para abordar calquera dos obxectivos específicos da PAC.
O límite máximo de axuda por agrupación beneficiaria será de 600.000 euros, e os proxectos poderanse executar ata o 1 de maio do ano 2027. Os investimentos non produtivos terán unha intensidade de axuda do 100% e os grupos operativos poderán solicitar un anticipo de ata o 50% da subvención, previa constitución de aval ou garantía. A intensidade de axuda para os investimentos produtivos será do 65%.
As agrupacións que resulten beneficiarias pasarán a denominarse “grupo operativo supraautonómico.
Con esta liña de financiamento da innovación, o ministerio pretende crear valor engadido a través dunha relación máis estreita entre a investigación e as prácticas agrícolas e forestais. Así mesmo foméntase un maior uso do coñecemento dispoñible, así como unha aplicación práctica máis rápida de solucións innovadoras.
As solicitudes das axudas poderanse presentar ata as 14.00 horas do 28 de setembro de 2023, a través da sede electrónica do Ministerio de Agricultura, Pesca e Alimentación.
A INNOVACIÓN NO PLAN ESTRATÉXICO DA PAC
O apoio á innovación a través dos grupos operativos supraautonómicos enmárcase no Plan Estratéxico da PAC (PEPAC) DE España 2023- 2027, dentro das axudas de desenvolvemento rural de ámbito supraautonómico na intervención de cooperación-innovación baixo a filosofía da AEI-Agri.
A AEI-Agri persegue acelerar a innovación no sector agrario para lograr unha agricultura competitiva que produza máis con menos recursos e menor impacto ambiental. A súa posta en marcha produciuse hai xa unha década e serviu para que o segundo alicerce da Política Agraria Común impulsase a innovación no sector agroalimentario, con actuacións específicas complementarias ás que se derivan da política de I+D+i europea e nacionais.
Nas seguintes ligazóns pódese consultar máis información sobre as axudas aos proxectos innovadores
- Xornada informativa sobre as axudas a proxectos innovadores supra AEI - Agri – YouTube
- Preguntas frecuentes (FAQ)
Así mesmo existe unha caixa de correos no que se poden realizar consultas e resolver dúbidas: idiagri@mapa.es