A Maxistrada-Xuíz encargada do Rexistro Civil Central publica no BOE un edicto que recolle a listaxe máis completa dos españois falecidos nos campos de concentración de Mauthausen e Gusen, un total de 4427 vítimas, para que os familiares e outros achegados destes poidan presentar alegacións e correccións no prazo dun mes. Transcorrido este período de alegacións serán rexistrados como falecidos no propio Rexistro Civil Central, condición que ata hoxe aínda non teñen.

A información recollida pola Dirección Xeral dos Rexistros e do Notariado procede dos libros correspondentes que se custodian na sede do Rexistro Civil Central sobre os españois que faleceron nos citados campos de concentración nazis e foi cotejada con outras bases de datos para realizar as comprobacións pertinentes. O edicto contén dúas direccións webs a través das cales os interesados poderán acceder á listaxe definitiva e presentar as alegacións que consideren oportunas.

Esta iniciativa forma parte das medidas recollidas na Lei de Memoria Histórica como agradecemento e reparación aos máis de dez mil españois que foron deportados aos campos de concentración nazis, desprovistos da súa nacionalidade española por decisión do goberno franquista, declarados apátridas e dos cales máis de cinco mil perderon alí a vida.

O Consello de Ministros, na súa reunión do pasado 26 de abril de 2019, aprobou a instauración do día 5 de maio como día da homenaxe aos españois deportados e falecidos en Mauthausen e noutros campos e a todas as vítimas do nazismo en España.