O Senado condena tamén con esta moción "as diversas prácticas represivas" do franquismo, os discursos "próximos" ao fascismo e a xenofobia, fai un recoñecemento das vítimas do réxime de Franco e reclama unha "actualización" da Lei da Memoria Histórica.

O portavoz socialista, Fernando Martínez, ex director xeral de Memoria Histórica, defendeu a moción e asegurou que hai un deber de homenaxear "aos que loitaron pola democracia" na guerra civil, na ditadura e desde o exilio. O senador reivindicou que se estableza unha homenaxe anual ás vítimas da ditadura pero tamén aos exiliados, con quen o Estado ten unha gran débeda. "Mantiveron as súas conviccións e contribuíron de maneira eficaz á reconquista das liberdades e de construción da política nos primeiros momentos da transición". Para Fernando Martínez "é unha gran achega á memoria democrática europea".