O Goberno de España celebrou, durante o pasado ano, ata un total de 110 reunións de conferencias sectoriais coas comunidades autónomas, no marco do diálogo e o entendemento entre administracións. Así se reflicte no ‘Informe sobre a actividade dos órganos de cooperación de 2024’, do que tomou coñecemento hoxe o Consello de Ministro.
A principal conclusión á que chega o informe é que o sistema de órganos de cooperación en España, consolidado tras máis de catro décadas de existencia, constitúe a base do modelo de gobernación multinivel, coa Conferencia de Presidentes e as Conferencias Sectoriais como eixos principais.
Estes órganos confirmáronse como os principais foros de debate e adopción de acordos sobre asuntos políticos e sociais clave, como a distribución territorial de fondos do PRTR ou as crise enerxética e migratoria.
A Conferencia de Presidentes celebrou ata a data 28 reunións, das cales 22 tiveron lugar no período comprendido entre 2020- 2025.
O Informe reflicte que hai 44 conferencias sectoriais activas, que celebraron un total de 110 reunións en 2024, un aumento considerable con respecto ao ano anterior, no que se convocaron 87. Neses encontros adoptáronse, en total, 152 acordos, dos que 120 foron decisorios e 32 de coordinación.
Ademais, destácase no informe a notable capacidade de adaptación e mellora continua do sistema de gobernación, ao que se incorporaron innovacións normativas e procesos de dixitalización como o Real Decreto 440/2024, do 30 de abril, sobre criterios de funcionamento das Conferencias Sectoriais ou a Orde PJC/385/2024, do 30 de abril, pola que se crea a Plataforma Dixital Cooper@ de Colaboración entre as Administracións Públicas.
En definitiva, os avances logrados grazas á cooperación entre Estado e comunidades autónomas en 2024 en ámbitos clave das políticas públicas evidencian que a cooperación non é un fin en si mesmo, senón un elemento esencial no noso Estado Autonómico e unha ferramenta esencial para ofrecer servizos públicos máis eficaces, mellorar a toma de decisións e reforzar a transparencia e a rendición de contas
