- A subdelegada do Goberno recoñece o traballo da Escuadra Miño Lucense e das Forzas e Corpos de Seguridade para garantir o desenvolvemento da proba
- A competición celebrarase os días 16 e 17 de outubro, cun percorrido de 448,20 quilómetros, dos que 104,6 serán cronometrados
- López pide aos afeccionados que respecten as zonas habilitadas
Olimpia López, subdelegada do Goberno en Lugo, participou na presentación da 48 edición do Rally San Froilán, que se celebrará os días 16 e 17 de outubro. Durante a súa intervención, destacou o traballo de coordinación necesario para salvagardar a seguridade nunha competición que reunirá a milleiros de afeccionados nas estradas da provincia.
López agradeceu o labor da Escuadra Miño Lucense, da Policía Nacional, da Garda Civil e dos servizos de emerxencias, así como dos voluntarios implicados na organización. «Detrás do espectáculo que veremos sobre o asfalto hai moito máis: preparación, coordinación e moitas persoas que traballan para que, cando arranque o primeiro coche, todo estea preparado», sinalou.
Competición
Olimpia López lembrou que a proba, que forma parte do Campionato de Galicia de Rallyes de Asfalto, contará con dez treitos e 104,6 quilómetros cronometrados, ademais de sistemas de seguimento GPS, avisos SOS e bandeira vermella electrónica.
A subdelegada pediu aos espectadores que respecten as indicacións da organización e das Forzas e Corpos de Seguridade e permanezan nas zonas habilitadas. «Gozar dun rally significa tamén saber onde debemos estar e onde non podemos estar», sinalou.
Tamén felicitou a Dani Berdomás, proclamado campión galego nO Carballiño o pasado 26 de setembro, e destacou o esforzo necesario para alcanzar o éxito deportivo.