A Delegación do Goberno en Galicia acolleu esta mañá a presentación do cómic colectivo ‘50 anos, 10 historias’, que achega á mocidade, a través da visión de dez ilustradores, os dereitos e as melloras sociais alcanzadas tras a chegada da democracia en España. A actividade forma parte da programación impulsada pola Delegación e o Comisionado do Goberno para a conmemoración dos 50 anos de España en Liberdade, que este ano/este ano presta especial atención á mocidade e á súa relación coa democracia.
Na presentación participaron o delegado do Goberno, Pedro Blanco; o director creativo do proxecto, Manel Cráneo, e unha das ilustradoras participantes na iniciativa, Inés Vázquez. Pedro Blanco describiu o volume como “unha publicación que aborda o dereito ao voto, a liberdade de expresión, o dereito ao aborto, o divorcio, os dereitos laborais ou a igualdade de xénero”.
O delegado destacou o valor da programación que está a levar a cabo a Delegación durante este mes, “na que facemos dialogar á mocidade sobre a democracia, o que conseguimos desde o ano 1975”, achegándolles os logros e posibilidades dunha estrutura política que garante as liberdades e a convivencia.
O cómic, que o delegado agradeceu aos seus autores, xorde dunha iniciativa liderada por Manel Cráneo e consiste na publicación en colectivo de dez historias deseñadas por dez ilustradores, nas que abordan os cambios sociais e os dereitos conquistados coa chegada da democracia.
Os autores e autoras participantes, consagrados e noveis, son Paula Esteban, Guitián, Jorge Fernández, Leandro, María Brenn, Sebas Martín, Jano Viñuela, Teresa Ferreiro, Inés Vázquez e o propio Manel Cráneo.
Da publicación editáronse 600 exemplares en galego, que se distribuirán nas actividades vinculadas á conmemoración dos 50 anos de España en Liberdade organizadas pola Delegación e as Subdelegacións do Goberno nas catro provincias. Ademais, editaranse outros 600 volumes en castelán. Entre os temas tratados figuran o dereito ao voto, a liberdade de expresión, os dereitos laborais, a igualdade entre mulleres e homes, o divorcio, os dereitos LGTBI, o aborto, a sanidade pública e o recoñecemento do galego como lingua cooficial.
Ademais, a Delegación ofrece a publicación gratuitamente en liña nesta ligazón.
Actividades en todo o territorio
Xunto a esta publicación, a Delegación do Goberno acolleu nas semanas anteriores a realización dun taller de creación de fanzines, o primeiro dos catro que tiveron lugar nas catro provincias. Todos eles foron dirixidos por Inés Vázquez, ilustradora tamén do cómic, e contaron coa participación de alumnado das escolas de artes.
Estas actividades forman parte da programación ‘Mocidade e Democracia’, que aposta pola cultura como vía para achegar a memoria democrática ás novas xeracións. A iniciativa inclúe propostas relacionadas coa música urbana, a literatura, o teatro, a regueifa e as redes sociais, ademais do cómic, con actividades distribuídas polas catro provincias galegas.