- A subdelegada: “É moi importante achegar á mocidade os recursos necesarios para recoñecer e evitar situacións de desigualdade nas súas relacións sociais”
- Nesta sesión do Plan Director sobre a violencia de xénero participan cen escolares de Cuarto da ESO do IES Lucus Augusti da capital lucense
- No que vai de ano, 10.549 mozos e mozas lucenses asistiron ás 258 actividades que os formadores da Policía Nacional levaron a cabo na provincia
A subdelegada do Goberno en Lugo, Olimpia López, asistiu hoxe á actividade informativa sobre a violencia de xénero impartida no IES Lucus Augusti, dentro do Plan Director. Alí, resaltou a importancia de “achegar á mocidade os recursos necesarios para recoñecer e evitar situacións de desigualdade nas súas relacións sociais”. A actividade estivo dirixida ao alumnado do Cuarto da ESO e nela participaron cen escolares.
Os axentes Rubén Darío Veiga e Iván García, formadores da Policía Nacional, foron os encargados de impartir a charla sobre a violencia de xénero e prevención de delitos sexuais. A subdelegada destacou a importancia deste programa e agradeceu a predisposición do centro e a implicación dos axentes formadores “que se desprazan os distintos centros de ensino para previr algunhas das cuestións que nos/nos preocupan a todas e todos, como o bo uso das novas tecnoloxías, o ciberacoso ou a violencia de xénero”.
Datos do Plan Director
Durante o presente ano 2026, xa se levaron a cabo 258 actividades cun total de 10.549 participantes na provincia. Estas accións de sensibilización e prevención, desenvolvidas polas forzas e corpos de seguridade nos centros escolares lucenses, versaron sobre ciberseguridade, acoso escolar, delitos de odio, adiccións e violencia de xénero e prevención de delitos sexuais, entre outros.
Día Internacional da Eliminación da Violencia contra as Mulleres
Ademais da asistencia a esta sesión, co motivo do Día Internacional da Eliminación da Violencia contra as Mulleres, o vindeiro mércores 25 de novembro, a subdelegada do Goberno fará a lectura do manifesto institucional as portas da sede da Subdelegación do Goberno ás 11:30 horas, onde tamén se gardará un minuto de silencio polas vítimas da violencia de xénero. Neste acto participará a asociación Axel, coa colocación dunha mesa de concienciación para interpelar á cidadanía.
Para completar a programación, na entrada do edificio poderá visitarse, desde mañá, a exposición ‘Inmarcesibles’, con fotografías realizadas por María Fernández.