La subdelegada do Goberno nA Coruña, María Rivas, inaugurou esta mañá no Centro Penal de Teixeiro o curso de verán da Universidade Nacional de Educación a Distancia (UNED), titulado “Persoas estranxeiras en prisión. Cambios, retos e propostas á luz do novo Regulamento de Estranxeiría”. O encontro analiza os efectos e implicacións da nova normativa aprobada polo Goberno en novembro de 2024 e que entrou en vigor o pasado 20 de maio de 2025.
Durante a súa intervención, Rivas destacou a necesidade de tratar a realidade migratoria con rigor, responsabilidade e enfoque en dereitos: “O novo regulamento ofrece respostas xustas, claras e baseadas en dereitos para un fenómeno complexo como é a migración, que require políticas firmes pero profundamente humanistas”.
O novo Regulamento de Estranxeiría adapta o marco legal español á realidade actual do fenómeno migratorio, ás demandas do mercado laboral, ao envellecemento da poboación e ás recomendacións da Unión Europea. Segundo datos oficiais, en España residen na actualidade máis de 7 millóns de persoas estranxeiras, o que representa aproximadamente o 14% da poboación total. Destas, máis de 3 millóns están afiliadas á Seguridade Social, cun peso crave na sustentabilidade do sistema público. Organismos como o Banco Mundial e a Comisión Europea calculan que farán falta ao redor de 250.000 migrantes ao ano para soster o Estado de Benestar español.
La nova normativa introduce melloras substanciais:
• simplifica trámites administrativos e elimina duplicidades,
• reforza os dereitos das persoas migrantes e das empresas que as contratan,
• e crea vías claras, seguras e ordenadas para a chegada e regularización de persoas estranxeiras.
O regulamento tamén incorpora un Plan de Integración e Convivencia Intercultural, co obxectivo de fomentar unha sociedade máis cohesionada, diversa e con igualdade de oportunidades, pois os informes indican que o 48% do contido en redes contra os migrantes é violento explícito.
Entre as medidas máis destacadas figura a posibilidade de regularizar ata 300.000 persoas ao ano durante os próximos tres anos, mediante mecanismos áxiles que favorecen a inclusión social e laboral de quen xa reside en España.
Rivas explicou que, durante os seis meses posteriores á súa aprobación e antes da súa entrada en vigor, o Goberno de España puxo en marcha unha intensa campaña formativa e informativa, incluíndo charlas xurídicas en 15 cidades de 9 comunidades autónomas —entre elas, Galicia—, así como xornadas presenciais e en liña con entidades do terceiro sector, xuristas, administracións públicas e persoas migrantes.
Ademais, reforzouse o persoal nas oficinas de Estranxeiría con 250 novas incorporacións, seis delas na Subdelegación do Goberno nA Coruña, e está prevista a contratación de 500 persoas máis, cun investimento de 2 millóns de euros para garantir unha aplicación efectiva da nova normativa.
La subdelegada agradeceu o compromiso da UNED da Coruña, especialmente da súa directora Ana Novo, e da coordinadora do curso, a profesora Elena Maculan, por promover espazos de reflexión crítica e formación especializada en temas de tanta relevancia social. Tamén recoñeceu o traballo do director do centro penal, José Ángel Vázquez, por fomentar un modelo de xestión moi dinámico, baseado na reinserción e na educación como ferramenta de transformación.
“A prisión non pode ser un espazo de esquecemento ou exclusión, senón un lugar en que se garantan a igualdade de dereitos e oportunidades para a reinserción”, concluíu.