El delegado do Goberno en Galicia, Pedro Blanco, visitou hoxe en Láncara a explotación leiteira SAT El Pombal, onde reivindicou o compromiso do Goberno de Pedro Sánchez co sector primario galego. Un respaldo que, afirmou, “estamos a demostrar con feitos, como son os máis de 56 millóns de euros do Ministerio de Agricultura en axudas extraordinarias para facer fronte á subida dos custos de produción pola seca e a guerra en Ucraína, que beneficiaron a 6.600 explotacións leiteiras en Galicia”.
O delegado lembrou que esta partida forma parte dun paquete de máis de 80 millóns de euros que chegaron a un total de 33.500 produtores. Así mesmo, puxo en valor os 142 millóns de euros transferidos á Xunta e pagados ás explotacións galegas a través da Política Agraria Común (PAC) na campaña de 2024 e destacou o esforzo especial do Goberno en apoiar o sector lácteo “fundamental no desenvolvemento económico e social de Galicia”, con máis de 3 millóns de euros transferidos á Xunta “aínda sen ter as competencias na materia” para combater a Enfermidade Hemorráxica Epizoótica (EHE).
Acompañado polo propietario da granxa leiteira, Odón Castro, polo alcalde de Láncara, Darío Rodríguez, pola subdelegada do Goberno en Lugo, Isabel Rodríguez, e polo deputado provincial, Pablo Rivera, o delegado puxo en valor “o modelo familiar, sustentable, innovador e rendible que representan moitas das granxas galegas e que se ejemplifican nesta que hoxe visitamos, mostra de que o noso campo ten futuro sempre que haxa apoio e compromiso, como hai no Goberno de España”.
Así, Pedro Blanco fixo un chamamento á Xunta de Galicia para que asuma a súa responsabilidade e as súas competencias e adopte medidas eficaces para garantir o futuro do sector agrario galego.
"Vemos con moita preocupación como cada ano a política do medio rural da Administración autonómica levou ao peche de 350 explotacións leiteiras. É preciso que a Xunta cambie o rumbo e escoite as demandas do sector", alertou Blanco.
Finalmente, o delegado reiterou que o Goberno de España seguirá apoiando aos gandeiros galegos e traballando para afrontar retos como o relevo xeracional.
"Explotacións como a de Odón demostran que hai ganas, hai traballo e dedicación, pero necesitan apoio. Contáis co Goberno de España para dar resposta ás vosas demandas e garantir que o campo galego siga sendo unha fonte de oportunidades", concluíu.