Ourense, 30 de maio de 2023.- O subdelegado do Goberno en Ourense, Emilio González, apelou hoxe á “acción do Goberno coa protección dos máis vulnerables” destacando como un país que “non mira para outro lado e que non se lava as mans nun asunto tan complexo como son os movementos migratorios”.
Emilio González destaca que a última reforma da Lei de Estranxeiría “mellora o noso modelo migratorio e os seus procedementos”. E puxo en valor a “colaboración e a cooperación sen as que é imposible camiñar”. “Este Goberno sempre estivo á altura, o noso país e, en especial, a provincia á que represento caracterizámonos por ser un lugar de acollemento cos brazos abertos, con protección e garantías”. Por iso, “actúase cunha enorme “xenerosidade, e empatía; pero tamén con absoluto rigor e responsabilidade exercida desde un marco legal que está continuamente renovándose e mellorándose para actuar con todas as garantías”.
Emilio González pronunciouse así na apertura da “Xornada de estranxeiría e empregabilidade” organizadas pola Subdelegación do Goberno e que contou coa participación do director xeral de migracións do Ministerio de Migracións, Inclusión e seguridade social, Santiago Yerga; o director provincial do SEPE, Celso Fernández; a xefa da dependencia de traballo da subdelegación, Mar Martínez e a xefa de estranxeiría, Josefina Rodríguez; e Gonzalo Sáez representante e avogado da ONG Arraianas.
“O obxectivo da reforma do regulamento de estranxeiría é mellorar o modelo migratorio e favorecer a incorporación ao mercado laboral das persoas migrantes con medidas como, por exemplo, facilitar a permanencia e o traballo dos estudantes estranxeiros, actualizar as figuras de arraigamento social e laboral ou facilitar a entrada de emprendedores”, tal e como puxo de relevo o director xeral de migracións, Santiago Yerga.
Ademais, Yerga resaltou que “traballar con migracións supón cooperar e colaborar na xestión da diversidade” e puxo de manifesto que “toda a sociedade debería enriquecerse coas achegas das persoas estranxeiras que recalan no noso país.” E anunciou a creación dunha “oficina de estranxeiría” en Vigo que centralizará e axilizará os trámites de toda Galicia tal e como anunciou a pasada semana o ministro de Migracións, Inclusión e Seguridade Social, José Luis Escrivá.
O director xeral ha explicado que nos últimos tres anos realizáronse 2 reformas no regulamento de estranxeiría. A primeira delas en novembro de 2021 relacionada cos menores estranxeiros non acompañados e mozos ex tutelados que cumpren a maioría de idade cuxos resultados foron “excelentes en todo o conxunto” -18.000 mozos e mozas viron normalizada a súa situación documental en España o que cualificou como un “éxito fronte ao ruído que supuxo”.
Esta actividade desenvolveuse na sala da casa cultura cedida polo Cineclub Pai Feijóo, lugar no que se albergaba a antiga biblioteca pública e dirixíronse especialmente ás ONG, representantes do colexio de avogados de Ourense e do colexio de traballadores sociais, así como, aos diferentes colectivos multiculturais arraigados na provincia e os traballadores sociais de todos os concellos.
Así mesmo, caracterizáronse por ser unhas xornadas inclusivas contando con intérpretes de linguaxe de signos para facilitar o acceso á cidadanía seguindo o ronsel que mantén a excelencia da Subdelegación do Goberno ourensá situada ao servizo de todos e todas os cidadáns e cidadás.
Obtención de emprego e autorizacións
Desde a Subdelegación do Goberno, M. Mar Martínez Pacheco e Josefina Rodríguez Durán, falaron das principais problemáticas que supoñen os procesos burocráticos para a obtención de emprego de migrantes ou da necesidade de nova poboación en idade de traballo en España unido á baixa natalidade do noso país. Tamén puxeron en valor os requisitos de regulación da migración por principios de solidariedade.
Así mesmo, destacaron datos sobre a nova reforma, talles como o arraigamento laboral, o arraigamento para a formación, o certificado de emigrante retornado, autorizacións de residencia, requisitos, tramitacións de expedientes, obrigas, etc.
Gonzalo Sáez, avogado da ONG Arraianas, explicou o marco administrativo e os avances que se deron en materia de estranxeiría nos últimos 23 desde que se aprobou a lei de Estranxeiría no ano 2000 e “a necesidade de crear novas realidades nas que se poña o foco desde a perspectiva migrante, evitando que os colectivos e as mulleres ocupen nichos de emprego precarizados”.