Allariz, 30 de xaneiro de 2023.- O subdelegado do Goberno en Ourense, Emilio González, acompañado do Xefe de Inspección de telecomunicacións da provincia, Enrique Sanmartín, visitaron esta mañá as instalacións do proxecto cultural A Casa Vella, en Amiadoso (Allariz), para coñecer o impacto das políticas de dixitalización do Goberno nos concellos do rural e no sector turístico. Alí reiteraron o compromiso do Goberno de Pedro Sánchez coa conectividade total da poboación, un alicerce da acción pública que se está levando a cabo co Programa UNICO-Banda Larga, no marco do Plan de Recuperación, Transformación e Resiliencia.
O Programa UNICO-Banda Larga é unha das liñas do Ministerio de Asuntos Económicos e Transformación Dixital para garantir a conectividade completa da poboación en 2025. Ademais, é un elemento estratéxico das políticas do reto demográfico, xa que a dotación de internet é un servizo básico para o desenvolvemento económico das zonas rurais e a fixación da súa poboación.
Na provincia de Ourense, beneficiaranse 55.773 fogares e empresas para o que o Goberno achegará 20,7 millóns de euros.
Visita a Allariz
O Subdelegado do goberno, Emilio González e o xefe de inspección de telecomunicacións coñeceron as instalacións da Casa Vella da man dos seus fundadores, Nuria Sotelo e Rubén Vilanova, onde comprobaron a incorporación da tecnoloxía e da conectividade dixital nas distintas áreas e achegas dos seus residentes para dar a coñecer o seu negocio de emprendimiento e arraigamento e explotación das insdustrias culturais “xerando que a conectividade lles abra xanelas ao mundo e podendo atraer os seus proxectos de residencias artísticas a residentes de latinoamérica”. Un proxecto “sen o que a conexión e a fibra óptica” non podería existir tal e como destacaron os seus fundadores.
Emilio González destacou a importancia de implantación deste programa de banda larga para a superación de reto demográfico e evitar o desarraigamento do rural nunha provincia como a de Ourense. Ademais dentro da comarca de Allariz- Maside este proxecto supón que non só se poida atraer talento de fóra; se non que o “sector turístico dunha vila como a de Allariz poida evolucionar e desenvolverse coa mellora da conectividade”.
A Casa Vella beneficiouse do programa PEBA do Goberno para a conectividade, o que posibilitou a dotación de internet a esta proxecto cultural que ten como clave a dinamización do rural, o que resultou clave para a consolidación do negocio que lles permite realizar difusión a través de canles web e atraer residentes do estranxeiro. Actualmente, A Casa Vella, tamén participa nun programa do IGAPE e IberEscena con financiamento con Fondos do Plan de Recuperación, Transformación e Resiliencia para “ampliar e diversificar a oferta cultural en áreas non urbanas” e atraer talento de Latinoamérica á dinamización da zona.
No Concello de Allariz, o Programa UNICO-Banda Larga contempla a extensión da banda larga a 381 vivendas e empresas situadas en 78 zonas que hoxe non teñen este servizo. Con este traballo completarase a conectividade de Allariz que se iniciou co anterior plan estatal, o Plan PEBA.