O Ministerio de Política Territorial e Memoria Democrática incoou o expediente para declarar a Ponte Avenida de Irún, en Guipuzkoa, como Lugar de Memoria Democrática, pola súa relevancia histórica e por considerarse un referente material da memoria das vítimas da Guerra e do exilio.
A Ponte Avenida tivo un papel relevante no caso do exilio a Francia, nos primeiros meses do conflito bélico, pois era unha das principais vías de conexión terrestre entre ambos os países. Miles de refuxiados utilizaron este camiño para saír cara a Hendaia, nalgúns casos, baixo as balas das tropas sublevadas.
“O Goberno de España recolleu a solicitude do Concello de Irún, do 14 de xuño do ano pasado, e decidiu incoar o procedemento de declaración da Ponte Avenida como Lugar de Memoria Democrática, tal e como expón a Lei de Memoria Democrática de outubro de 2022”, sinalou o secretario de Estado de Memoria Democrática, Fernando Martínez, que participou hoxe nun acto de homenaxe ás vítimas en Irún.
A Ponte foi o escenario no que se desenvolveu a primeira das cinco ondas de refuxiados que se produciron desde España cara ao exterior durante a Guerra. Tan só un mes despois de comezar a contenda, durante a ofensiva das tropas sublevadas en Gipuzkoa, produciuse un primeiro éxodo dunhas 15.000 persoas, a maioría mulleres e nenos, que cruzaron a fronteira cara a Hendaia durante os días previos á ocupación de Irún.
“Na ponte da Avenida de Irún desenvolvéronse feitos de singular relevancia pola súa significación histórica e simbólica, vinculados á Memoria Democrática, especialmente referentes á saída de miles de cidadáns e cidadás ao comezo da guerra de España e durante a ditadura franquista: exilio, intercambio de prisioneiros, etc.; que fan que esta ponte se converta nun referente de Memoria para toda España”, agregou o secretario de Estado.