• O alumnado de terceiro da ESO do IES Lucus Augusti visitou as instalacións da Subdelegación do Goberno para coñecer as orixes da institución e recibiron unha charla sobre a prevención da violencia machista en contornas dixitais
• A subdelegada deulles a benvida e explicou que “detrás das administracións hai persoas e servizos que forman parte da nosa vida diaria, como pode ser a solicitude do certificado dixital, trámites de estranxeiría, cuestións de seguridade, igualdade de xénero ou, en xeral, atención á cidadanía”

A subdelegada do Goberno en Lugo, Olimpia López, recibiu na sede da Subdelegación do Goberno en Lugo, dentro das actividades organizadas con motivo da Semana da Administración Aberta, ao alumnado de terceiro da ESO do IES Lucus Augusti. López lembroulles que “detrás das administracións hai persoas e servizos que forman parte da nosa vida diaria, como pode ser a solicitude do certificado dixital, trámites de estranxeiría, cuestións de seguridade, igualdade de xénero ou, en xeral, atención á cidadanía”.

Durante a visita, os alumnos e alumnas puideron coñecer as instalacións da man de persoal da administración, así como as orixes da institución, que radica na figura dos antigos xefes políticos, recollidos nun artigo da Constitución de 1812.

Despois, a xefa da Unidade contra a violencia sobre a muller, Rosa María Rivas, impartiulles unha charla sobre violencia en contornas dixitais e como previla. “Este é un tema que vos afecta directamente como mozas e mozos”, matizou a subdelegada. O relatorio centrouse de xeito específico na ciberviolencia de xénero e na ciberviolencia sexual, “aínda que existen múltiples manifestacións das violencias dixitais”.

“É importante que a mocidade poida achegarse e coñecer este edificio, a súa historia e tamén o labor que desenvolven os distintos departamentos da Subdelegación para sentir que estes espazos públicos son seus tamén”, concluíu a subdelegada.

Xornada de portas abertas

Este venres 22 de maio, as portas da Subdelegación lucense estarán abertas, ata completar aforo, para a poboación xeral interesada en coñecer de preto o seu funcionamento e os principais servizos públicos cos que conta, que poderán comprobar de primeira man nunha visita guiada a partir das 10 horas.

O obxectivo principal das actividades é o de dar a coñecer o funcionamento das Administracións Públicas seguindo os principios de Goberno Aberto, como a transparencia e a participación cidadá.