• O alumnado do ciclo superior en Integración Social do Centro Integrado de Formación Profesional da Politécnica de Lugo visitou o Centro Penitenciario de Monterroso para coñecer as instalacións e o traballo  que  se desenvolve alí
• “Poder ver a profesionais que interveñen neste medio é unha experiencia moi enriquecedora e que pode abrir espazos a futuros perfís de empregabilidade”, sinalou a subdelegada
• Á actividade asistiron quince alumnos, dous profesores e persoal da Subdelegación do Goberno

A subdelegada do Goberno en Lugo, Olimpia López, recibiu hoxe ao alumnado do ciclo superior en Integración Social do Centro Integrado de Formación Profesional da Politécnica de Lugo, que participou na primeira actividade con motivo da Semana da Administración Aberta: unha visita guiada as instalacións do Centro Penitenciario Monterroso. Alí, a subdelegada, destacou o traballo dos funcionarios da institución e animou aos alumnos e alumnas a continuar a súa formación e a ter en conta a de monitor de rehabilitación psico-social como unha das súas saídas profesionais.

Olimpia López destacou nesta liña que “poder ver a profesionais que interveñen neste medio é unha experiencia moi enriquecedora e que pode abrir espazos a futuros perfís de empregabilidade”.

Durante a visita, os estudantes puideron coñecer un taller ocupacional de marquetería e escritura creativa, visitar as instalacións onde se desenvolve a actividade formativa e laboral de soldadura, madeira ou mantemento de infraestruturas xerais do centro penitenciario e coñecer os programas específicos de tratamento para determinados delitos ou colectivos que  se imparten no centro.

O obxectivo desta xornada foi o de amosar non só as instalacións e o traballo que se desenvolve alí, senón tamén o de poder analizar competencias desde os módulos formativos que se cursan neste centro, como habilidades sociais, inserción laboral ou contexto e metodoloxía de intervención social.

Á actividade asistiron quince alumnos, dous profesores e persoal da Subdelegación do Goberno. A iniciativa da Semana da Administración Aberta pretende dar a coñecer o funcionamento das Administracións Públicas seguindo os principios de Goberno Aberto, como a transparencia e a participación cidadá.