A subdelegada do Goberno na Coruña, María Rivas participou no II Congreso de Acción pola Saúde Integral das Mulleres organizado pola asociación A Ciencia é feminino que se celebra hoxe no Museo Naciona de Ciencia e Tecnoloxía (MUNCYT).
María Rivas agradeceu o traballo e esforzo que fai esta asociación en dar visibilidades ás científicas en Galicia. “A nosa mocidade, as nosas nenas precisan referentes, espellos nos que mirarse, modelos que lles permitan decir, ‘Eu quero ser catedrática de inmunoloxía como África Gonzále ou catedrática de alimentos como Ángeles Romero ou catedrática de Ciencia de Computación e Intelixencia Artificial como Amparo Alonso'.
Durante a súa intervención a subdelegada puxo en valor o traballo do Goberno en prol dos dereitos da saúde sexual e reprodutiva das mulleres: “As baixas laborais por menstruacións incapacitantes ou as medidas para acabar coa pobreza menstrual son dereitos que temos as mulleres e que foron recoñecidas por este Goberno”.
María Rivas lembrou que malia a que as cousas están a cambiar para as mulleres no ámbito da saúde “necesitamos seguir avanzando e facelo máis rápido, e grazas ao traballo e ao esforzo que facedes moitas das mulleres que hoxe estades aquí, a mirada feminista sobre a saúde iniciou un proceso para o que xa non hai marcha atrás”.
A subdelegada tamén recordou que durante demasiado tempo “as nosas dores foron minimizadas, infradiagnosticasas e relegadas a ese caixón de xastre que durante anos foi a saúde mental, outra das grandes damnificadas por un exercicio patriarcal da medicina”.
María Rivas agradeceu ao MUNCYT por acoller encontros como o de hoxe e tamén loubou o labor que fan asociacións como Asarga (Asociación de Sarcoma de Galicia), Querendo (Asociación de Mulleres con Endiometriose), ABAC (Asociación de Bulimia e Anorexia da Coruña) e Innovatia 8.3 que hoxe estiveron presentes nesta segunda edición de Acción pola Saúde Integral das Mulleres.