Os cidadáns e cidadás puntúan cun 4,91 sobre 5 a atención recibida polo persoal que atende os servizos públicos en delegacións e subdelegacións do Goberno nas comunidades autónomas.
É o resultado destacado da Enquisa de satisfacción realizada a case 10.000 cidadáns e cidadás nas oficinas da Administración Xeral do Estado (AGE) no territorio.
O ministro de Política Territorial e Memoria Democrática, Anxo Víctor Torres, destacou que, con estes datos, “consolídase a alta valoración das oficinas, tanto no conxunto nacional como nas distintas unidades territoriais, xa que todas obteñen unha valoración por encima de 4 sobe 5, o cal mostra unha boa opinión xeneralizada sobre o servizo prestado”.
No conxunto nacional, a puntuación supera o 4,7 nas catro dimensións analizadas: horario de apertura (4,72), tempo de espera para ser atendido (4,77), resultado da xestión (4,82) e, sobre todo, atención prestada polo persoal (4,91), moi próxima á nota máxima e que reflicte, ademais, o valor profesional e humano do persoal ao servizo da AGE no territorio.
Doutra banda, o ministro Torres lembrou que se elaborará unha auditoría para coñecer os impedimentos e barreiras que quedan para converter todas as oficinas da Administración Xeral do Estado no territorio en plenamente accesibles e sen ningún obstáculo para as persoas con discapacidade.
Características da enquisa
O uso do papel na enquisa permitiu, á súa vez, incrementar a participación da poboación maior de 65 anos, que en 2022 cubriu só 110 enquisas, fronte a 840 enquisas desta edición, pasando dun 3,65% dos enquisados a un 8,97%.
Se valoramos o perfil máis frecuente do enquisado, trátase dunha muller, de 18 a 40 anos e nacionalidade española. A proporción de mulleres e homes participantes na enquisa como usuarios das oficinas é bastante equilibrada e con tendencia á redución de diferenzas entre ambos os sexos.
En canto á idade, o grupo de 65 ou máis anos é o menos frecuente; e, por último, o 38,25% dos usuarios participantes na enquisa non ten a nacionalidade española, unha porcentaxe moi elevada se se ten en conta que no cómputo global da poboación residente esa porcentaxe é do 13,16%.
Máis da metade dos enquisados, o 53,83%, acudiu sen cita, aínda que entre os maiores de 65 anos esa porcentaxe elévase ao 71,31%. Evidénciase tamén un maior uso da cita previa entre os usuarios de menor idade, pois o 51,76% de enquisados de 18 a 40 anos obtiveron previamente cita, mentres que entre os enquisados de máis de 65 anos só o 28,69% acudiran con cita.
Servizos máis demandados: rexistro e certificados dixitais
O 79,17% dos enquisados acudiu a realizar xestións de rexistro e certificados FNMT/Cl@ve. Os tipos de xestións máis realizados nas oficinas son o rexistro de documentos (44,98%) e a expedición de certificados dixitais FNMT/Cl@ve (34,19%). Precisamente os servizos prestados polas oficinas en relación cos certificados dixitais FNMT/Cl@ve e os apoderamentos son os que reciben a valoración máis alta con maior frecuencia por parte dos usuarios, respectivamente, nun 88,08% e un 84,78% das ocasións.
Consolídase a tendencia á alza desde 2021 na satisfacción co servizo recibido, o cal permite concluír que se está producindo unha mellora da percepción dos servizos prestados polas oficinas por parte da cidadanía.